A Chuenis

D`Bise zieht düre Bode. Ds Wasser gfriert.

D`Schneeflocke stöbere z`tuusige vom Himmel obe ache.

D`Menschemasse versammlet sich düre Schwand.

Es isch die Zyt im Jahr, nach lescht Jahr, die erschte Tage im Januar.

Das Jahr isch alls anders, mir gedenke a Crans Montana - sone Tragik.

Nacher Schwiegeminute geit der Tumult wieder los. Klar Aagsicht dem Bärg lehts de

Zueschouer schnäll ds Bluet u der Pischte ds Wasser i de Adere gfriere.

Es geit umi drum, nid iizfädle u nid Uszscheide,

sondern däm Bärg die chalti Schultere z`zeige.

Dises Jahr im Schneegstöber trotze die Athlete wie immer däm Chuenisbärgli.

Tribüne füllt sich, d`Mensche lache u fröie sich uf das Spektakel.

Das hesch jitz de ds Sibezgischte mal gseit oder nu meh, dass hüt vor Siebezg Jahr ds

erscht mal öpper gwunne het a däm Hang, aber ja es isch wahr.

Vorem Fernseh, frage sich aller, zwüsch de Athlete,

öb`s äch ä Schwyzer uf ds Podescht schafft.

Hie muesch d`Wälle schlücke, u da konsequent der Ski i d Rille drücke, taktisch fahre,

höch blibe für i Zielhang achezstäche.

Ned zum säge was die Skifahrer alls uf sich nähme,

läbensmüed weme weiss a wellne Stelle die nu Tor ufstelle

wome o nu söll drum um kurve,

das inere Herrgottsrueh u nu schnäll derzue.

We ds Renne si Louf nimmt, chunnt der Zwöit grad hinderdrii.

U de merksch, es verhaltet sich wie bim Schach: z`lescht chunnt O der matt zum Zug.

Mit Stöck a de Händ u Stöckliski a de Füess, macht er sich parat usem Starthüüsli z`gah.

D`Fans trage ihn u übertrage im Sinn nume der Druck uf ihn,

was bedütet, dass nu chli meh Gwicht uf die Kante drücke.

Es beflüglet ihn vom Helm zu de Füess, bis i ds Ziel.

Dä versetzt die ganzi Skiwält i ds Stuune u gwinnt, zum Füfte mal i Serie.

Der Atle Lie McRath u der Marco gäbe im Adelbode ume alle Grund ds Vogellisi singe,

i alli Nacht ine, näbscht de obligatorische Songs wie Ca Plane pour moi wo sii das Jahr klar

füre Léo Anguenot chönne ablah.

Langsam verstumme die leschte Fetene u de chert ume Rueh ii -

zminscht bis nächscht Jahr am Chuenisbärgli.

-Diego Bircher